KK2-0149 - Manau dum hpang wa ai lam (Origin of Manau) with transcription

Full description

Transcription (Ja Seng Roi) Ya an hte Jinghpaw ni shawng n nan manau dum hpang wa ai gaw Mali Hku Majoi kaw nna hkrat n na Chyai Hku Majoi kaw du, Hkrang Hku Majoi kaw du ai hpang she an hte Manau dum hpang wa ai re. Ya Manau dum hpang wa ai lam ni gaw ya ndai U amyu ni gaw ndai Mahtum Mahta nat ni kaw Manau dum sa lam na lu ai Shan hte Manau dum sa ai shaloi U amyu ni mung Manau dum ai hpe nat ni manau dum ai hpe mu la, na la nna bai wa n na gatji gatrai si myin ai a ten hta lagat kaji mahkra hpe shan hte gaw kalang ta n sha ai sha, shan hte Manau dum n na pyen gayawt hkawm n na tinang a mahku mara tinang chye, tinang ngoi ai, pyaw ai npyaw ai mahkra hte n sen jahkum n na, pyen gayawt hkawm n na e tinang a mahku mara tingang chye, tinang ngoi ai, pyaw ai npyaw ai mahkra hte nsen jahkum nna, pyen gayawt nna, Manau dum nna, ndai lagat si hpe di sha ai lam nga ai hpe gaw ndai an hte a Magawng amyu rai nga ai Magawng Dingyau ngu wa sa mu ai. Sa mu ai majaw dai shani kaw na an hte Manau hpe dum hpang wa ai re nga na an hte a labau hta nga ai an hte galaw sa wa ai lam re. Rai na dai manau kaw gaw U ni kaw na an hte lu la ai dai kaw na an hte gaw n dai Manau amyu grai nga ai, ndai Manau amyu hpan law law nga ai kaw na ya ahkyak ai hku na ya dai ni Manau nau ai gaw, Sut Manau, Padang Manau, rai na ndai Shadip Manau, Ji Nat jaw ai Manau, rai nna hpyen rawt na Manau, rai na ga shadawn tsun ga nga yang gaw rawt malan manau, hpyen rawt ai ngu ai gaw ndai majan rawt ai re majaw rawt malan manau ndai ni hpe dum nna nga ai. Re na ndai U amyu ni hta shan hte a manau jaiwa gaw Ura u rai nna, manau madu gaw hkawngrang re nga na tsun ma ai. Re na u amyu ni mung yawng garan nna shan hte lit hpe la ai. Manau jaiwa gaw mahku pyaw ai ndai ura u hte ndai shingdi u hpe e di ma ai da. Re na ndai an hte a u ni hpe zawn an hte gaw shinggri u mai tsan hpe tsat nna manau nau ai dai kaw tsat ai lam ni gaw e dai kaw na hpang ai. E shi gaw manau jaiwa wa ai nsen pyaw ai majaw masha yawng hpe kahkyin lu ai majaw shi a e Sinwa u mai hpe shakap ai lam ni nga ai. Rai na ndai hkawngrang gaw manau madu tai ai dai majaw hkawngrang baw hpe shakap n na manau nau sa wa ai lam re. Rai na kaga ni ma hkra mung an hte manau dum ai shaloi gaw shi a ndai manau amyu hta hkan nna e ladat, dum ai ladat ni mung an hte galaw sa wa ai ladat ni mung grai nga ai. Rai na Manau gaw dum ai mali ya re na Htinghtang Manau ngu ai dum jang gaw matsat ya nau ai, dai gaw law dik re. Ju Manau dum ai shaloi gaw, Padang Manau dum ai dan re Ju Manau dum ai shaloi gaw tinang a sut lu nga mai lam, awng dang ai lam a majaw dum ai mung ndai baw ndai hpe gaw Padang Manau ngu ai. Re na kashu kasha nlu wa na kashu kasha lu wa na matu mung Manau dum ai. Dai shaloi ndai gwi ninggrau ngu hpe masat nna dan na ndai ka lai la re lam hpe galaw ai lam ni nga ai, nga na e dai ni du hkra ndai tsun hkai ai lam ni nga ai. Rai na hkrak galaw ai lam ni mung nga lai wa sai hku re. Dai re majaw dai ni an hte Wunpawng Jinghpaw amyu ni hta Manau dum nna galoi mung Manau dum ai amyu re ngu gaw an hte a sali wunli , mi an hte a ginru ginsa hkrat wa shaloi an hte a masat masa htunghking langai hku na lang ai lam re. Dai re majaw an hte a Manau gaw grai ahkyak ai lami laman langai hku na e ya yawng hpawn e hkap la ai Manau htunghking Manau ngu ai ndai gaw grai ahkyak ai, an hte Jinghpaw ni matu lachyum pru ai Manau langai mi re ngu na chye lu ai. . Language as given: Jinghpaw